الجرح عميق ومؤلم 73 شهيداً دفعة واحدة!
04 فبراير 2012
من مقالاته:
صحيح الخسارة فادحة وصحيح الطعنة نافذة وصحيح الجرح عميق ومؤلم 73 شهيداً دفعة واحدة! وكأنها معركة حربية! اللي اختلط فيها دم الشهداء بدموع الثكالي عشان يكونوا نهر موازي لنهر النيل! هي دي مصر المحروسة الغالية أم الشهدا والصابرين وهما دول احنا المصريين .. بعد الوطن وكرامته وعزته ما عندناش غالي حتي الروح بترخص نحبك يا محروسة يا جنة ربنا في ارضه يا حبة عين المصريين.. لكن انا مزنوق في كلمتين وشوشة عايز اقولهم في ودن:
1- الكابتن فهيم حكم مباراة المصري والاهلي في بورسعيد انت يا كابتن كان عندك اسباب تلغي المباراة من أولها بعدما شفت بعينك الصواريخ التي انهالت علي لاعبي النادي الاهلي من مدرجات مشجعي المصري في ستاد بورسعيد اثناء فترة التسخين علاوة علي الطوبة اللي جابها لك المساعد بعدما انضرب بيها من الجماهير البورسعيدية وبالامارة خدتها منه ورميتها ورا ضهرك دون ان تسأله عنها او حتي تنظر إليه! مش ده حصل؟ أمال ليه أصريت علي إقامة المباراة؟ مش ده برضه سؤال؟ أكيد كان عندك اوامر بضرورة إجراء المباراة إنما الاوامر دي من مين؟ هو ده الخيط اللي ممكن يوصلنا للحقيقة وعموما انت حر في الاجابة من عدمها لكن لازم تعرف إن دم 73 شهيد بريء بقي في رقبتك انت وانت اللي حتتحاسب عليه.
2- السيد الوزير المحافظ معقول يا راجل تفضل تتنطط زي فرقع لوز وتحضر جميع المناسبات والاحتفالات في المدينة الباسلة وتيجي عند المباراة دي وتخلع! مين اللي قال لك ما تحضرش المباراة؟ قول ماتخافش وخلص ذمتك من ربنا قبل ما تقف بين ادين ربنا زي التلميذ البليد.. اللهم بلغت اللهم فاشهد واللي بيشيل قربة مخرومة بتخر علي دماغه.
3- الكابتن مدير أمن محافظ بورسعيد انت كنت فين يا حلاوة وسايب الملعب يضرب يقلب لحد ما جري اللي جري؟ كنت فين قول ماتخفش أنا مش ربنا راح اخد روحك قول ربنا يخرب بيتك ويحرق قلبك علي اعز ما عندك زي ما حرقت قلوب الامهات الثكالي قول «ثكلتك أمك» علي رأي كفار قريش.
4- المشير محمد حسين طنطاوي القائد الأعلي للقوات المسلحة ورئيس المجلس الاعلي للقوات المسلحة وكبير المصريين وولي امرهم في هذا الزمن المدوحس انا سمعتك وشفتك في المخروب التليفزيون وانت بتسأل «فين الناس!» ناس مين اللي كنت بتسأل عنهم ولو لا قدر الله لقيت الناس دول كنت عايز منهم يعملوا إيه؟ فيه إيه يا جدعان؟ عموما أنا عايز اقول لك كلمتين حازقيني يا محمد يا خويا انا وانت بقينا رجلنا والقبر وعن قريب حنتلاقي عند رب كريم «يوم لا ينفع مال ولا بنون إلا من أتي الله بقلب سليم» يا محمد يا خويا ماتخليش اللي اسمه حسني مبارك الحرامي يجرجرك علي جنهم الحمرا ويمكن انت راجل طيب في الاساس ومكانك الجنة وان شاء الله نبقي زملا وجيران في الجنة بتاعة الغلابة الطيبين وعلي العموم الفرصة لسة قدامك وانا بإذن واحد أحد في انتظارك في جنة ربنا الطيب اللي بيحب الطيبين وإلي اللقاء واللهم بلغت اللهم فأشهد والسلام علي من اتبع الهدي.
طباعة المحتوى
أرسل المحتوى الى صديق
